ბოლოსონეტი  წიგნისა  ,, 60 + ''
ანუ  ,, მინაწერები  ცადსაფრენ  წერილებზე''


გამოვჭერ  გამოსაჭრელი
გულიდან  ლექსის  თარგები...
აწ  ვარ  ვით  ჩიტი-ფრთაჭრელი,
მსჯავრს  მინდობილი  განგების...

ანდა  -  ვით  ვინმე  რაინდი,
უხმლო,  უაბჯრო,  უფარო...
მესმის  შიშინი  ჩაიდნის
და  გულისცემა,  უბრალოდ...

იმედის  ძაფზეც  ვეკიდე,
გულშიგან  ჯავრიც  ვინახე...
თუმც  ჯერ  ბედს  თვალიც  ვერ  ვჰკიდე,
არც  ვფიქრობ,  დავთმო  სილაღე...

-  ენდე!..
-  ეს  გული  ჯერ  კიდევ
მრავალს  აგინთებს  ჩირაღებს!!!