მიართვით ქალბატონს ღრუბლების ბლომანჟე,

წვიმის კოქტეილი და სიო–ბრიზები;

მიართვით ტორტი და მიართვით ბლომად რძე,

გთხოვთ, გაანებივროთ ის სიურპრიზებით.

უთხარით, უთხარით ხშირად, რომ ქალია.

გარეთ კი ქარია უცხო და მტარვალი.

თუმც, ჯერ ზამთარია, თუმც, ჯერ ავდარია,

მაინც დაუკრიფეთ მას იასამანი.

თუ გაგიბრაზდებათ, ნუ ელით დანდობას,

მის დაუნდობლობას ბოლომდე მიენდეთ;

ოჰ, შხამად ნუ უქცევთ მას ყმაწვილქალობას,

ინებეთ ის, რასაც ქალღმერთი ინებებს.

მიართვით ბალიში, დაუგეთ საწოლი.

ზეწრებად ვარდები უხდებათ ასულებს...

იხილავთ სასწაულს – ეს ქალი– სასწორი

ცოლის დღესასწაულს თუ როგორ ასრულებს.

                                                  13.03.11