I am constitutionally competent to contest the elections

Benazir Bhutto
Prime Minister of Pakistan

დაიწყო მერე სახელმწიფო სათათბიროს დეპუტატების არჩევნები. ჭიათურაში, სხვათაშორის, პოეტის მომხრეებმა (იგულისხმება თ. აკაკი წერეთელი) წამოაყენეს აკაკის კანდიდატურა. დაუდგეს საარჩევნო ყუთი, აკაკის მოწინააღმდეგე პარტიამ აკაკი გააშავა, რამაც პოეტი მეტად შეაწუხა

ვარინკა წერეთელი







  პირველი სიტყვა, მოდი, იყოს პირველი, თუნდაც ასე უაზროდ, მაგრამ პირველი. როგორღაც უნდა დამეწყო ეს წერილი და ახლა ვფიქრობ, რომ უკვე ნებისმიერი სიტყვა, მეორე იქნება.
  დღეს ისეთი ქარია ჩემს უბანში, რომ ის დღე მახსენდება, საარჩევნო უბნიდან, პენსიონერებისთვის, საარჩევნო ყუთი რომ მიმქონდა სახლებში; მართალია ზამთარი იყო და ციოდა, მაგრამ ასეთი ქარი არ ყოფილა. ახლა რომ მქონდეს ეს ყუთი წასაღები და გავიდე ამ ქარში, ყუთიანად წამიღებს  და მერე ეძებეთ თქვენი ხმები ნაგავსაყრელებზე…
  მოკლედ, როგორც დედაჩემი მეტყოდა, (ოღონდ სხვა მნიშვნელობით) რა ენაზე გელაპარაკოთ არ ვიცი, მაგრამ რადგან 4000 წლის წინაც არსებობდა ეს ენა, ამიტომ 1300 წლის მერეც იარსებებს და გწერთ ამ ენით.
  ისეთი არაფერი მაქვს სათქმელი, რაც არ თქმულა აქამდე. ლენონი ხომ გაგიგიათ, იყო ასეთი მომღერალი, რომელიც მოკლეს იმის გამო, რომ იმღერა “God is concept By which we measure Our pain”… აჰ, ხო ვიცი, ვიცი რომ მოგეწონათ, მაგას რა ჯობია მერეო იტყვით, ალბათ, თქვენ დემოკრატიის მამები, რომლებიც პიონერები იყავით სიდჰართას შემდეგ, ათეიზმის პროპაგანდისა დასავლეთში და მერე მთელს მსოფლიოში; ამ პროპაგანდის უკან, იდგა თქვენი მაღალგანვითარებული ტექნოლოგიების ათასობით ინსტიტუტი, ლაბორატორია, სამედიცინო დაწესებულება და ა.შ. ხალხსაც სხვა გზა არ ქონდა: როდესაც არჩევანს გთავაზობენ და მასთან ერთად იმასაც, თუ რას და რას შორის აირჩიო,  რაღაცას ირჩევ და მერე, არჩეულს თავისუფლებას ეძახი. ესეც თქვენი დემოკრატია. უკვე აპრობირებული, ისეთ ქვეყნებშიც, როგორებიცაა სომალი, ერაყი, ავღანეთი, ტუნისი და ა.შ. ჰოდა ლენონზე გეუბნებოდით, მაგ სიტყვების მერე მოაყოლა : “I don't believe in Hitler” - ჰო, ამასაც არაუშავს, რომც მოგწონდეთ ხმამაღლა მაინც ვერ იტყოდით.” I don't believe in Kennedy” - ამაზე რას იტყვით, მოგწონთ? ალბათ გაღიზიანდებით, ეს როგორ გაგვიბედაო.

“I just believe in me”  - აი ამიტომ კი, მოკლეს.

  რა მაინტერესებს, ქალების ემანსიპაციის პროცესმა რა ნიშნულს მიაღწია? ხმის მიცემის უფლება აქვთ, გასაგებია და ახლა რა ხდება, როგორი მდგომარეობაა, მამაკაცების სამზარეულოში მასობრივი  ტრიალია, თუ  შვილების ძიძებთან მიბარების ტენდენცია? ისე როკფელერები ალბათ ახლა ისე ამაყობენ, ეს მოძრაობა რომ წამოიწყეს, როგორც არასდროს. რა ცოტაა საჭირო, რომ ხალხმა დაიჯერეოს ის, რაც გინდა რომ დაიჯეროს, მაგ. გადაიღებ ფილმ მატრიცას და ყველას ჯერა, რომ ადამიანები ვერასდროს შექმნიან ხელოვნურ ინტელექტს. მართლა, რა ქენით შექმენით ბოლოს და ბოლოს? კიდე რა მაინტერესებდა: ფიდელ კასტრო ისევ ეწევა? ერთი მაგან ვერ დაანება და მეორე ჩემმა მეგობარმა კიდე.
  როცა ჰოლოგრამაში მოათავსებთ ამ წერილს და წაიკითხვათ, ერთი ჭიქა, წითელი ღვინით სავსე, ასწიეთ და თქვით: ხსოვნა იყოს ამის დამწერისო. ასე ამბობენ ჩემს ქვეყანაში და მინდა იცოდეთ თქვენც ეს ტრადიცია.
  3333 წელია ქრისტეს შობიდან და მიხარია, რომ გახსოვთ. ისე რისი წელია, ვირთხის თუ ღორის, ჩინური ჰოროსკოპის მიხედვით? თუ ღორის, მაშინ ახალ წელს, ნუ შეაპიწკინებთ მსუყედ გოჭს და ნუ გასჩრით ხახაში ბოლოკს, თორემ, წელი გიწყენთ და ბარაქა მოგაკლდებათ. არა, ეს ტრადიცია არაა ჩემი ქვეყნის, მაგრამ ერთ დროს, პოპულარული ვარსკვლავთმრიცხველის რჩევებია; თუ ვირთხის წელია, ნუ დაუგებთ ხაფანგებს და დუსტს ნუ დაუყრით, თორემ, ისიც გაგინაწყენდებათ და ბარემ კოსმოსის დასუფთავების გადასახადიც რომ მიგებათ გრავიტაციის ენერგიის გადასახადზე ცუდი არ იქნებოდა, ქემაინც ერთბაშად მოვა.
  “კარუსელებს” რაც შეეხება, ძალიან სწრაფად არ ატრიალოთ, “აბრატკას” მაძლევს და თანაც ყველას მინდა მოვკრა თვალი. ეკუმენური მსოფლიო შედგა. არ ვიცი რა გქვია: საქართველო, გაერთიანებული მსოფლიო, ახალი დედამიწა, თუ რა, მაგრამ ერთი ვიცი, რომ არჩევნები სამართლიანი მაინც არ იქნება.