შენი სუნი იმ წამიდან მიყვარს,
ძილბურანში პირველად რომ გნახე
და მას მერე, ყოველ ღამით ვსუნთქავ-
შენით გამთბარ, ულამაზეს წამებს...

რომ არ მყოფნი მოფერებად დედი,
ვიქეც შენი მშვიდი ძილის მცველად.
დილაობით წამალივით მშველის-
შენი ერთი, ლაღი გაღიმება.

ატიტინდი, გახდი დიდი გოგო,
გადამრია შენმა ტკბილმა ენამ.
შენებურად სიყვარულს რომ მიხსნი
ჩემი სისხლის ყველა წვეთი თბება.

სიარულსაც ცდილობ უკვე მარტოდ.
დაბარბაცებ სასაცილოდ შენთვის
რომ როგორმე მიეპარო თაროს,
გამიფუჭო ტუჩსაცხი ან კრემი...

პაწაწუნა კიჭუნებით კბენა
იქცა ცელქო შენს საყვარელ საქმედ
მერე ისე გამიცინებ ტკბილად
მავიწყდება გაბრაზებაც მალე.

ჩემს მკლავზე რომ გეძინება მშვიდად
ვერაფერს ვგრძნობ სიხარულის გარდა.
გამეზარდე ბედნიერი გოგო
მე კი მუდამ გეყოლები ფარად.