დიახ, სემ ჰოლი გახლავარ, დიახ, სემ ჰოლი გახლავარ,
სწორედ სემ ჰოლი გახლავარ, სემ ჰოლი მქვია - მეთქი,
ყველანი მძულხართ ერთიან, ყველანი მძულხართ ერთიან,
ერთურთიც გაგიწყვეტიათ, თქვენ შეგაჩვენებთ ღმერთი !

მე მითხრეს კაცი მოვკალი, ვითომ მე კაცი მოვკალი,
დიახ, მე კაცი მოვკალი, მართლა მოვკალი - მეთქი -
შინ რო მივადექ კვირადღეს, რო მივადე და მივადე
და ცოცხალ - მკვდარი მივაგდე, იმას დასწყევლის ღმერთი !

ქალაქით მღვდელი მოვიდა, ქალაქით მღდელი მოვიდა,
პირველად მღვდელი მოვიდა, მღვდელი მოვიდა მეთქი,
სულ დაბღვერილი მიმზერდა, ჭკვაზე არ ვიყავ ისედაც,
გეენას ცეცხლი მიხსენა, იმას დალახვრავს ღმერთი !

მერრე შერიფიც მოვიდა, მერრე შერიფიც მოვიდა,
ბოლოს შერიფიც მოვიდა, ისიც მოვიდა - მეთქი,
თან მოჰყვნენ ვიღაც კაცები, ტანმაღალი და მხარგრძელი,
არ მომეწონა არც ერთი, იმათ გაჟუჟავს ღმერთი !

თოკი მიაბეს ალვის ტოტს, თოკი მიაბეს ალვის ტოტს,
მიმიყვანეს და დამკიდეს, თოკზე დამკიდეს - მეთქი,
ქვევიდან მიკიჟინებდნენ: ჰეი, სემ, ხომ გითხარითო,
ჰეი, სემ, ხომ გითხარითო ! იმათ გაუწყრეს ღმერთი !

ჩემს ნელის თვალი მოვკარი, ჩემს ნელის თვალი მოვკარი,
ცისფერი კაბა ჩაეცვა, ცისფერი კაბა - მეთქი,
- მართალი ხარო ცათამდე, სემ, რაღა ჭირი გადარდებს,
ღმერთს იხილავო ცხადადვე, იმას დასწყევლის ღმერთი !

დღეს მართლაც სამოთხეში ვარ, დიახაც სამოთხეში ვარ,
ქრისტეს ტაძარში დავდივარ, მეცხრე ცაში ვარ - მეთქი,
მალე მრუშებს და მეძავებს - მეც ხომ მათ გამო ვეწამე -
გეენის ცეცხლზე შესწვავენ, როგორც მაღლაა ღმერთი !