სხვამ გაიხაროსო - გეწერა თვალებში სურვილი,
მე წავიკითხე და შენს გვერდით  მდუმარედ  დავდექი.
მივხვდი, რომ სინათლე,  რომლის წინ, გარშემო, -სულ ვივლი,
იდგა ჩემს წინაშე და აღარ მეწერა დამდეგი-

ნათება, ტკივილი, დაცემა, წინსვლა და ყოველი
მტკიცება, რომელიც განგებას უცვლელად მოიცავს.
ვიცანი გოგონა; გოგონა, რომელსაც მოველი,
ბავშვობის დროიდან, მანამდე, მერე და მოიცა -

დეთ ახლა სადა ვარ, სადაც მზე გულიდან ამოდის
და გული მზენაზავ სევდას და სიხარულს ატარებს?
- ნამდვილად! - დიდია სიზუსტე ბედის და ამინდის;
ნამდვილად გულები გვეზრდება, ვითარცა პატარებს;

ვითარცა მწვერვალებს ეწევათ სიტურფე, რომელშიც
მერცხალი სიცოცხლის ვერცხლისფერ ბუდეებს იკეთებს.
მე შენში ვიშოვე ცხოვრება: ვიხილე, რომ შენში:
სხვამ გაიხაროსო - ყვაოდა თვალებზე სიკეთე.

                                                    ავტორი: მუხრან აბაშიძე