ნეტავ სადმე ვიყოთ ახლა
სადმე უკაცრიელ ტყეში
შეშას ვაგროვებდეთ გზადაგზა
ნელა ვალაგებდეთ ცეცხლში,

ქარი გაჰკიოდეს ხმამაღლა
კვამლი გვერეოდეს თმებში
ისე შეგიყვარო ამაღამ
ცამდე აგაფრინო ხელში

ნეტავ გიზიდავდე თანდათან
გული ერთი ძგერდეს ჩვენში'
ისე მიყურებდე თამამად
წამი მერეოდეს წლებში

ნეტავ ქოხი გვქონდეს პატარა
ხელით ნაშენები მთებში
ბევრი არ ვინატროთ ბარაქა
მხოლოდ მაგიდა და თეფში