მე შენ გითხარი, რომ აქლემები
მინახავს ნემსში როგორ ძვრებიან.
ბედაურები მოაქროლებენ
წინაპრებს,ჩვენსას, ოქროსძვლებიანს.

წყალმა წაიღო ინიც, იანიც,
ყველა მურვან ყრუ, ყველა ატილა
და ქვეყნად ყველა ადამიანი,
ადამიანი არის ნამდვილად.

დამარცხებულის მზერით უცქერის
ზეცას, ვერ შეძლო მეტი ეზიდა
და დედამიწა, როგორც მუცელი,
მოულოდნელად მოწყდა ღერძიდან.

მე შენ გითხარი, რომ აკლდამებში
გაღვიძებია ყველა ფარაონს,
დგანან მზის შუქზე მომაკვდავები,
ინიავებენ ქარის მარაოს.

გადაივიწყეს შუბი და დენთი,
ტიტების სროლით გული იჯერეს.
მიყვარხარ- მეთქი და ერთადერთი
უკანასკნელი არ დაიჯერე.