აჰ, ნეტავი, იმ ქვეყნების მარაქაში გაერიო,
ვინც არ ელის მოწყალების გამოწვდილ ხელს გაეროდან,
აჰ, ნეტავი, შენს ჩრდილოელ მეზობელსაც გაერიდო.
აჰ, ნეტავი, თელავიდან, სიღნაღიდან, ახმეტიდან,
მოდიოდეს შემოდგომის ათასფერი, აჰ, ნეტავი,
გაეღვიძოს ფიროსმანს და კაკაბაძეს, ახვლედიანს.
აჰ, ნეტავი, იყო შლეგი, აპრილიან-მარტიანი
და შენს სახელს სდევდეს ძალა, შეგინახოს მატიანემ,
ისე, თითქოს ფიცხელ ომში მაჩაბელი დარდიანად
მღეროდეს და იმ ქვეყნების მარაქაში გაერიო,
ვინც არ ელის მოწყალების გამოწვდილ ხელს გაეროდან,
აჰ, ნეტავი, შენს ჩრდილოელ მეზობელსაც გაერიდო!