ეს კოშკი მე ავაგე
და ვეღარ გავდივარ
და გარეთაც არავინაა
მისი მძიმე კარის გამღები.

***
ნასახლარის ხავსიან ლოდზე
შემოდგომის ყვითელი ყვავილი_
წინაპრის ცრემლიან სიტყვასავით.

***
ერთ წყაროს ჯოჯოხეთშიც წააწყდები,
გახარებული შესვამ პეშვით
და სამოთხის მზის სუნი გეცემა.

***
ფუტკარი ყვავილის,
ხოლო პოეტი
სიტყვის სურნელებით
შედიან სამოთხეში.

***
ღვინო მოეკიდათ
და მათი სახეები
მღვრიე ჰაერისგან მოღერებულ
ნაჯახებს დაემსგავსა.

***
ღრუბელი_ გიტარა
ყვითელი სიმებით.

სერზე ყვავილების ქორწილი,
მაყარში_სხივები...

***
ვარსკვლავებიც ხარობენ
ამ ხმით_
მიწა იბზარება,
ყვავილი ამოდის.

დ ა ლ ო ც ვ ა
------------------
ისე კარგად უკრავ,მაესტრო,
ათას გაზაფხულს უნდა დაესწრო!

***
გაუქმებულ დოლაბზე
ორი გველი,
დიდი და პატარა,
დაშლილი საათის ისრებივით.

***
გული შანდალია,
სიტყვები_სანთლები.