მამაჩემო,
კლდეებზე მხტუნავ ჯიხვად რომ გამზარდე,
გესწავლებინა  აკვარიუმის
თევზად ყოფნა.

ჩავიგუბებდი პირში წყალს,
შევჭამდი - პატრონის ხარჯზე
და პატრონის გემოვნება  გახდებოდა ჩემიც .

გამოვიხედებოდი აკვარიუმის შუშებიდან
და  აკვარიუმის შუშები გახდებოდა ჩემი ზღვა.

აღარასოდეს მომინდებოდა
მეჭამა სხვა საკვები,
მყოლოდა სხვა პატრონი
და მეცხოვრა სხვაგან.

ახლა რომელ  აკვარიუმში ჩავეტიო?
როგორ ვაქციო ეს რქა ლაყუჩებად?