ნუ იხმაურებ, მეგობარო, აქ ღმერთებს სძინავთ,
ჯერ კიდევ ფერფლად არ ქცეულა დიდი ტაძარი,
სანამ გუმბათთან ავარდება ღამის ხანძარი,
სანამ ღრუბლებსაც წამოცდებათ სეტყვა ან წვიმა,
ნუ იხმაურებ, მეგობარო, მოდი, გადავწვათ
ეფესოს გული, არტემიდას ტაძრის კათედრა,
სანამ შავ ლექსებს დასაბეჭდად გადავათეთრებ,
სანამ თეთრებსაც მივიჩნევდე ერთ დიდ მარაზმად,
ნუ იხმაურებ, მეგობარო, მე ასანთს მოგცემ,
გადავწვათ ყველა წიგნსაცავი, მხოლოდ ზეპირად,
რაც დავიხსომეთ, ის გადარჩეს და ვინებივროთ,
არავინაა განმკითხავი. მხილველი. მოწმე.
ნუ იხმაურებ, მეგობარო, აქ ღმერთებს სძინავთ,
ჯერ კიდევ ფერფლად არ ქცეულა დიდი ტაძარი...