„სჯობს გაიცვითო,
        ვიდრე დაჟანგდე.“
დენი დიდრო.

**
სხეული თითქმის აღარ ვარგა (ნაჭერი დალპა),
თვლა აერია, მერამდენე ნაგლეჯი ბამბის
დაკარგა, უკვე შეიწიროს საცაა დამბლამ,
მისთვის არავის არ ჩაურთავს წლებია "დამბო".

წლებია უკვე, რაც აკლია ფოლაქი ყვრიმალს,
(ამოკემსილი პირით მაინც ვერავინ ყვირის)...
დაუმეგობრდა თაროებზე ფროიდის წიგნებს,
უპეებს შორის იკითხება საღათას ძილი!

და არიადნეს ძაფიც ცუდ დროს გაუცამტვერდა
(ძაფით დგინდება ჭრილობების ეკვივალენტი)
აბსურდულია საკუთარ თავს "მჯერა-არ მჯერა"
ეთამაშო და საბოლოოდ მაინც დანებდე.

*
ღიმილმიკერილს ემჩნეოდა მუშტრას სწავლება
ატომზე ხშირად, გახლეჩილი გორგლები ბორგავს
(შალის ქსოვილებს ნიჰილიზმი არ ესწავლებათ,
მხრებით რომ დააქვთ მთელი სევდა - სანსარას ბორბლის).