***
როდის იყო გარბოდი და შენი სიტყვის ვინმეს სჯეროდა?!

***
უბრალი ცხოვრებით შენში სხვაც ცხოვრობდეს,
ღმერთად დაბადების ტოლფასია.

***
მოძრაობს და მიკვირს, მე ეს შევძელი, მიუხედავად
გულ-მუცელის მრავალჯერ ამორევისა.

***
მზეს დავატარებ და მლოცავს ნაფოტი,
მუხას მოწყვეტილი, თუმც გადარჩენილი.

***
ჩემში დრო მიდის, მასში გაჩერებულა სიხარულად,
ყველა დედისთვის მარადიულობად ბოძებული.

***
მას არ აღელვებს რა იქნება, რა იყო, არ ირჩევს მდგომარეობას, რაც არის იმას უღიმის და მასთან შესახვედრად ემზადება.

***
ბიჭია თუ გოგო?!...
მუცელში მაინც ვაცადოთ, იყოს უსქესო, უსახო და უსახელო.

***
ხელი შევახე- დაიძინა,
დაველაპარაკე-შეიშმუშნა..
დუმილი შეურჩევია სიბრძნედ მუცლიდან.

***
მგავს არსებობით. არის თავისთავი, თავისსწორი და უსხვამსგავსო.

***
ნივთების გადაყრა-გადალაგებას მოვრჩი,
ხალხიც შეცოტავდა.
სივრცე გათავისუფლდა ახალი ადამიანისთვის.


***
ქარიც ხომ დარდობს,
შრომობს და ტოკავს,
ბალახს აცხადებს შეურაცხადად.

***
წვიმის წვეთია ყინვის ნაჟღენთი,
თუ გაიდარებს, მზესაც კი დაბანს.

***
მიდის არავისთვის დრო, ცარიელი ურემივით,
ცხენებს კი შეეტყოთ, ფლოქვების ჩლუნგ თქარათქურზე.

***
უსმინე მთას, უყურე ზღვას და შეეხე ბალახს..
გულზე ხელი დაიდე და კითხე,
კიდევ აინტერესებს თუ რისთვის მიცხოვრია?!

***
რასაც ვერ ვხედავთ, მისი ხომ გვესმის, რისიც არ გვესმის,
მას მაინც ხომ ვხედავთ?!
ჩვენს თავში ჩავიხედოთ, სხვებზე პასუხი იქვეა,
ხშირად სარკეში ჩახედვას.

***
ვგრძნობ უსიტყვოდ, თვალებით ვცნობ ადამიანებს,
რას იმეტებენ და რაზე უბრუნდებათ ფიქრი და გუმანი.

***
ჩიტს გალიაში მაინც დაუყვავე,
ყვავები თავისუფლებაშიც ეყოფა.

***
გძინავს თუ გღვიძავს ერთი ფასი აქვს, თუ არ მოქმედებ,
მდგომარეობა ნახევარი ზმნაა იცოდე.

***
მზესავით იღიმის, მთვარესავით იბადრება და,
ჯერ მხოლოდ ადამიანივით იყურება,
კრიალა გულითა და სუფთა სულით ხელს ართმევს უფალს.

***
გვამცნო ვინც არის და თავადვე გაუხარდა,
სიხარულის მაცნე რომ გახდა.

***
ახალშიბილი ცვარ-ნამი და სითბოა დედის ცრემლზე მონავარდე მარგალიტივით,
ტანჯვის შედეგად გამობრწყინებულ დაგვირგვინებად.