კედელზე კლიმტი და ლოტრეკი,
მუსიკა - ხან ბლუზი, ხან ჯაზი.
ვზივარ ერთ კუთხეში, მოტეხილ,
უპარტნიორობა მაბრაზებს...
ვწრუპავ დაძველებულ კონიაკს,
ვუსმენ საქსაფონის ვირაჟებს.
რაღაცა მოხდება, მგონია,
წვიმაც ამბავს მიწერს მინაზე...
ამ ბარში ვნებაა დიჯეი,
იცის რა მუსიკა დაუკრას...
ჩემი მარტოობა დინჯია,
სასმელთან ხმადაბლა ვსაუბრობ...
მუსიკა, სიგარა, აბსენტი,
განწყობას ეს ბლუზი უხდება.
რაღაც უცნაური აქცენტით
მიყურებთ ნაშიშვლებ მუხლებზე...
იქნებ, არაფერი ისეთი,
მზერაა მხოლოდ და რა მერე...
თვალებით ვთამაშობთ ბისერით,
რაღაც უჩეულო მანერით...
ყველაფერს სიგიჟის ფონი აქვს,
განწყობას, მუსიკას, განცდასაც,
იწყებს ემოცია ფორიაქს,
მგონი, ყლუპი ვნება გადამცდა...
თითები გრძელი და ნატიფი,
მზერა - გამოცდილი მეკობრის.
ვატყობ, მოვიხიბლე ამ ტიპით,
მანძილიც, ჩვენ შორის შემოკლდა...
მუსიკა, სიგარა, აბსენტი,
ყვრიმალთან ჩურჩულის შეხება...
იქნება, გამოკრას სასხლეტი,
"მისმა უწესობამ", შემთხვევამ?..