მიწისძვრის შედეგად, ნანგრევებიდან ამოყვანამდე, ერთმა მანდილოსანმა ითხოვა - მანდილი მომაწოდეთო, და თავდაფარების შემდეგ ამოვიდა... ამ ლექსს ვუძღვნი მის წარუშლელ კვალს - ჩემს მეხსიერებაში.

სათუთი სურათი

შენ გადაურჩი სიკვდილის ხელს და გააცოცხლე
კაცობრიობაც: დაცემული - რწმენამძინარე.
და დედამიწას გაუზომე უმზეო სიცხე,
და გული - ფრთების ანთებებით წაუმზიანე.

ო, როგორ, როგორ გამოვხატო, რას დავუზავდე:
ნანგრევს ანგრევდი და აშენებ სიხარულს ახლა, -
ანუ მანდილი შენ გეფარა არათუ თავზე,
არამედ სულის მწვერვალებზე უთუოდ მაღლა.

სასწაულია: როცა წარღვნას კაშკაშიც ახლავს, -
რომ სიბნელეებს ეუბნება უარს თავდახრით.
და წარღვნისთვისაც ჩვენ მადლობას ვწირავთ ღმერთს, რახან -
ამ სათუთ სურათს ვერასოდეს დავინახავდით.

                          8 თებერვალი, 2023 წ.