"You see things; and you say why?
But I dream things that never were;
and I sey why not."

"შენ ხედავ რაც ხდება; და შენ ამბობ - რატომ?
მაგრამ მე ვოცნებობ იმაზე რაც არასოდეს ყოფილა;
და მე ვამბობ - რატომაც არა."

George Bernard Shaw


ალისონს



შენ ხედავ რაც ხდება.
მეც ვხედავ რაც ხდება !

შენ ამბობ წახდები;
ამ თამაშ-თამაშში...

ამ კითხვის ნიშნებით
კაცი რას გახდება?

მე ვამბობ. და ვიწყებ
თაბაშირ-თაბაშირ...

გამო-ძერწვ... გამო... გა-
მოთაბაშირებას.

გამოძერ-წვას გამო-
უთაბაშირებელ,

ქვეყნად ოცნებების...
(ბრმად აფიშირებას)

ოღონდ ეს ხელები
ნუ შეგაშინებენ !

ისინი აგიგებს
ყინულის სასახლეს !

სულ მთლად უდაბნოში.
სულ მთლად უწყლობაში.

რომლის ჩრდილს მზის სხივი,
ვერასდროს გადახრის,

რომ ბრალი არ დაგდონ
არაფრის ფლობაში.

ხოლო ყოველ დილით
რადგან მზე ამოვა,

ცას ბედუინების
თავშალს მიალურჯებს,

ჩემი სიყვარულის,
გაგასწრებს ამბავიც,

რომ ბრალი არ დაგდონ
არც ჩემს სიყვარულში.

ასე და ამგვარად
ძვირფასო... ალისონ !

გახლავარ მეფე უ-
ბოროტო ოცნების.

არ უთხრა... არავის...
მართალი არისო,

რომ ბრალი არ დაგდონ
პოეტის კოცნაში.

ასე რომ არასდროს
მიმომინატრულო.

არც მიმომიხილო.
(ზედმეტად მოვეშვით...)

ჩემო სიყვარულო !
ჩემო სამხატვრულო !

რომ ბრალი არ დაგდონ
ჩემს სიახლოვეში,

ასე თუ ისე... და
ასე და ამგვარად

ვუბერავ ქარივით!
ჩემდაწილ... თაბაშირს.

გერჩივნოს ! გერჩივნოს !
გრიგალმა წაგგვაროს,

რომ ბრალი არ დაგდონ
ჩემს გაფიქრებაშიც.