* * *
შენი ავადმყოფი სურვილები
სისხლჩაქცევებით მკერდში
და ძილის სუნით დამხრჩვალნი
შენი სურვილები- მხრებზე მასხდებიან,
მისმინე, სინანულს ყოველთვის მოასწრებ
მოდი ამათ მოხედე, მძიმეა ჩემთვის...
დრო სულ გექნება- საკუთარ თავს
ბრალი რომ დასდო, გაატყავო, გადმოაბრუნო
და საკუთარი ფიტული შექმნა....
ახლა მოხედე შეშინებულ, დიდ თვალება
შენს სურვილებს, გადაიფერთხე კალთაში
რამე უმღერე, დააძინე, ოღონდ არ მოკლა
ჩემთან ისინი სუიციდს სწავლობენ
წაიყვანე, დიდ ხანს მაინც ვერ დავიტოვებ...
წამდაუწუმ ხელს ვაშველებ- მხრიდან ხტებიან
მოდი მოხედე, დრო სულ გექნება სინანულისთვის
ღამ-ღამობით მაღვიძებენ და პერანგს მახევენ
შენი სურვილები, ავადმყოფი და
საკუთარი არსებობით შეშინებულნი....
მოდი მოხედე რამე უმღერე, როგორც ადრე-
როცა ჯერ კიდევ სადღაც ქაოსში ისახებოდნენ
როგორც იმ ღამეს, როცა თვითონ მიეშველე დაბადებაში
ჩემი საშოდან, სიმღერით და ფერებით რომ გამოათრიე
ნახევრად მკვდრები, თავიდანვე პატრონივით
გზააბნეული , შენი ავადმყოფი სურვილები...