გეშინოდეს ვერ გადარჩენილი ბავშვის, რომელიც
სიკვდილის შემდეგ მუცელში დაგიტოვებს სითბოს.
გეშინოდეს, რადგან-
ის შიგნიდან ცოცხლად ამოგწვავს და
ყოველთვის იგრძნობ როგორ გაწერია სხეულზე
მისი ვერდარქმეული სახელი.
ყოველთვის იგრძნობ როგორ კითხულობენ ამ სახელს სხვები
და როცა წარმოთქვამენ ყურებს ხელებით ვერ დაიფარავ
რადგან ხელებზე ახლა მისი ნაფეხურები გამჩნევია
შენი ხელისგულები ორი პატარა სველი ფეხია
რომელიც მუდამ ცეცხლს აქრობს  და ყოველთვის იწვის.
გეშინოდეს ვერგაცნობილი მამის-
რადგან რატომღაც ქვეყნად ისევ არსებობენ საფლავები
და მამაშენი ახლა ის საფლავია- მოსიარულე.
ჰოდა გეშინოდეს, რადგან უკან უნდიხარ, შიგნით.
გეშინოდეს წყლის, რომელიც კისერში ჩაგდის
და ხერხემლის, რომელსაც დაეწყო მალების ცვენა.
გეშინოდეს გაცვენილი თმების და მშრალი თვალების.
რადგან ბავშვი, რომელიც ვერ გადარჩა შენი ასლია
და ასეთი- შენს მუცელში წნიასწარვე კვდება შიშისგან.