სანამდე წავალ,
სანამ ადუღებული სისხლიდან ამოყაფლული
სურვილები ალოკავენ
გაწბილების მკაცრ სინამდვილეს,
მომეცი უფლება,
უბრალოდ მოგეყრდნო.
---
რთულია ცხოვრება, ვიცი რომ მისურვებ
მდუღარე სიცოცხლეს ყოველდღე ვბედავდე,
შემახე ბაგეზე ცრემლების სისველე
და მაპატიე, რომ ვერასდროს გხედავდი   
ამ შებინდებამდე... ვერასდროს შევძელი
შეღებილ კერპებთან მოთქმა და ხმაური
და ვერ დავიჯერე, რომ სულის ენძელებს
ეწვება ფესვები, როდესაც აურევს
მიწა ერთმანეთში სიკვდილს და მარცვლების
მომავალ სიცოცხლეს... როდესაც ნამიან
ბალახთან დაფენილ მზეს დაენაცვლება
ბინდი და მეტყვის რომ სიცოცხლე წამია...
---
და მეც ჩამოვჯდები სისხლიდან ამოზრდილ
ყველა გაწბილების მკაცრ სინამდვილესთან
და გეტყვი: მომეცი უფლება, მოგეყრდნო.