(ექსპრომტად)

ქრისტე გფარავდეთ, ურაკელებო,
შობამ გვიბრწყინოს, ვინძლო, მზე-კალმად!
თუმც სისხლით გვემკას კვლავაც სამკალი,
ისევ იეკლოს ვარდზე ეკალმა!
რა ვქნათ თუ ნათლის სუფევის ნაცვლად
ლამის წალეკოს ბნელმა ქვეყანა!
მეც ბევრჯერ ძმურად გაწვდილი სითბო
თავ-პირზე ნაცრად შემომეყარა!
რას მოვესწარი ამ სიბერეში!
ნათქვამს  მიწუნებს ვიღაც ბეჟანა,
საკუთარ გესლში ამოვლებული
შორიდან უშნოდ შემომეჯღანა,
ვერ მივხვდი, ასე რატომ თავნებობს,
ან ჩემი ლექსი რატომ ემჟავა?
ვგონებ, ჭკუაზე  არ უნდა იყოს,
დაუჟღარუნა  რეტის  ეჟვანმა.
ზოგი რა გულღრძო დაიბადება!
ადრეც ვიღაცა ამიყირავდა,
თუმც მისი სიბრძნე  და უწრთვნელობა,
ვფიცავ, არ მიღირს არცა ჩირადა!
--------------------------------------------------
შატილის ციხის ქონგურებიდან
თეთრ ალამს ვფენ და გილოცავთ შობას,
არღუნმა რიყოს, რაც ავი იყო
და მივესალმოთ ურაკელთ ძმობას!