* * *
ვფურცლავ გვირილას
ბლაგვი ხელებით,
თითი შეაკრთო ენიდან ნერწყვმა,
არაფერი ვარ და
არაფრისთვის
უსასრულობამ მე
ღმერთთან შემრწყა.

          * * *
მე გავახილე თვალები წუხელ,
წუხილს საბანი ეფარა თბილად,
ბავშვობას მხოლოდ სიზმარში ვუმხელ,
რომ თავი ისევ მგონია ჩვილად...
წუხელის წუხილს გავართვი თავი,
მივიჩვიო თუ  გავაგდო? რა ვი ...

          * * *
მტკვარი არაგვს
ჩაეხუტა, ჩაეკონა, ეამბორა,
ჯვრიდან თვალი მივადევნე,
ნეტავ, მტკვარმა
უამბო რა?