ცას სწვდება გვირგვინის  გოდება,
სიმღერა იმღერეს გედებმა,
აპრილის ეს ღამე საუფლო
ვაჰმე, რა სისხლისფრად  თენდება!
დაიძრა წითელი  ლანქერი,
მტკვრის გული შუაზე გახია,
სანთლები  ტირიან ... სიონში
წმინდანთა  გულები მარხია!
რა ხდება, ცა  გოდებს, ზღვა ბორგავს
თუ ცრემლის და ცოდვის  ქვაბია?
ტიტების გვირგვინი  ტივტივებს,
საკლავად  ზედ  კრავი აბია.
ქაშუეთს  ესროლეს ტყვიები,
დედის კვართს სიბილწე ახოცეს,
ბინძური ჩექმებით ზედ შედგნენ
ნიჩბებით გაკაფულ სახორცეს!
ყვავილებს შეებნენ ტანკები,
ურჩხულმა სიბილწე ანთხია,
თბილსი ქართველთა წამებულ
სულების ჯვარცმა და ტახტია!
ცას სწვდება გვირგვინის  გოდება,
სიმღერა იმღერეს გედებმა,
აპრილის ეს ღამე საუფლო
ვაჰმე, რა სისხლისფრად  თენდება!