დღემ მორბენალ სტრიქონივით ჩაიარა,
არაფერი დატოვა.
მარტო შაქარი მქონია, ჩაი არა,
გულმავიწყობს ნატურა...
უკვე დავცალე კოლოფი სიგარეტი,
რა გავა გარეთ ახლა.
უჟმურ ხასიათს მთელი დღე ვიკავებდი,
თვალით არ დამენახოს!
გული გააწყალა წყრომით თებერვალმა,
ქარია სუფსარქისის.
ქუჩის მაწანწალა ძაღლი შემებრალა
ბედს უყეფს უვარგისად...
ბომჟების "ლოჟაა" ჩემი სადარბაზო,
სანაგვის "ბარონების"...
სულ მეკითხებიან, - როგორ ხარ, ლამაზო?
ცოტათი დაღონებით...
მოშავთეთრო სეზონი აქვთ გრაფიკოსებს,
თოვლი სულ ატალახდა.
შავ კაბაზე თეთრ ვარდსაც კი "დავიკოფსებ",
ზამთარს რომ გადავლახავ...
ამინდებს საღვინეს, ზოგჯერ საარყესაც,
ვიხდი და ვიცვამ ხოლმე.
ფიქრს დედიშობილას, (რომ არ დამაყენა),
მარტის მზეს მივათხოვებ!..
          05.02.12


უ-სურვილ-ობა

უამინდობას მთელი კვირა ამაოდ ვებრძვი,
არაფრისმთქმელი სახით მიმზერს სარკე კომოდის.
უსურვილობამ გადააგდო კისერი გვერდზე,
გავიკვირვებდი, საჩემოდ რომ რამე სდომოდა...
პროგნოზს მიკეთებს, გრძელვადიანს, ჩემი ლავიწი,
მელანქოლია მოიდუღებს ჩაის ან ყავას.
რით დამთავრდება ჩემი დარდთან ბრძოლა, არ ვიცი,
ერთი კი ვიცი, ეს ზამთარი ჯერ არსად წავა...
ჩემს ფანტაზიას გამოვიხმობ როლში მაშველის,
სადმე, თბილ ქვეყნის, თბილ კუნძულზე გადამსვას იქნებ.
უსურვილობას ახლა ”კლასი” უნდა ვაჩვენო,
ზამთარში  შიშველ ტანზემოცმულ უცხელეს ფიქრით...
             
        06.02.12