"მკერდში ჩაღვრილი თითები...
ჩემი თითები.
მკლავებში მომწყვდეული თმები...
შენი თმები."

წუთები რომელიც გინდა რომ გაგრძელდეს...
მუსიკა რომელიც სევდიანია და აზიური,
მუსიკა რომელიც გინდა რომ გაგრძელდეს...

მთვარე: რომელიც ილევა
მთვარე: რომელიც გცივა.
მთვარე: რომელსაც იძლევი
მთვარე კი არა მძივი

ყელზე: რომელიც გეხება
ყელზე: რომელიც გტკივა
ხელით და მერე ფეხებით
კი არ დარბიხარ, კივი.

ხმაზე: რომელიც სუსტია
ხმაზე: რომელიც მათრობს
და გვეკარგება ზუსტი დრო
და გვეკარგება ხათრიც.

ოთახის: სადაც სიჩუმე
ოთახის ძველი კრედო
ოთახის ბოლოს უჩუმრად
მომკვდარა როგორც მტრედი.