მოქმედების ადგილი: სადაც გენებოთ...
    დეკორაცია: როგორც გენებოთ.
   



შვილი: –სად ვართ ?
მამა: –მოვედით.
შვილი:–შუბლზე რა გჭირს?
მამა: –არაფერია...ცოტა მივარტყი.
შვილი: –ხელს მოგკიდებ... მეშინია!
მამა: –არ შემეხო დაგწვავ!
შვილი: –მამი, როდის მორჩება ეს საფეხურები?
მამა: –ჯერ მხოლოდ ახლა დაიწყო...
შვილი: –დავიღალე მა, გული მტკივა.
    კაცი შვილს ხელში აიყვანს და ისე გააგრძელებს ასვლას საფეხურებზე...
მამა: –გახსოვს პირველად, რომ შევხვდით?
შვილი: –არა მა არ მახსოვს.
მამა: –მე მახსოვს... ისეთი პატარა იყავი, მაგრამ მე ვიყავი დიდი, მთელს სამყაროზე დიდი, როცა ხელში პირველად აგიყვანე.
შვილი: –ასეთი სიტყვები ჩემთვის ჯერ არ გითქვამს.
მამა: –იმიტომ, რომ მხოლოდ ახლა მივხვდი, როგორ უნდა გიყვარდეს არაიმქვეყნიურად.
შვილი: –მა, უფალსაც ხომ უყვარდა თავისი შვილი?
მამა: –უყვარდა...
შვილი: –მაშინ, რატომ დაუშვა, რომ ტკივილი მიეყენებინათ მისთვის?
მამა: –უფრო დიდი ტკივილი, რომ აერიდებინა...
შვილი: –ჯვარცმაზე დიდი?
          დუმილი...
შვილი: –ახლა სად მივდივართ მა?
მამა: –დედასთან...
შვილი: –დედა ხომ ანგელოზებთან არის?
მამა: –კი, ანგელოზებთან...
შვილი: –მალე მივალთ?
მამა: –სულ ცოტა დარჩა...
შვილი: –შენც ხომ ჩვენთან დარჩები?
მამა: მე არა...
შვილი: ისევ უნდა დაგვტოვო?
  ისევ დუმილი...
შვილი: –მა, დედა...დე... ხედავ დედას?
მამა: –მხოლოდ, რამდენიმე საფეხური დარჩა...მარტომ უნდა იარო. მე უნდა წავიდე...
                                              * * *
    ეს ყველაფერი კი, დაიწყო ასე ...

  მანქანა...საჭესთან კაცი ზის...უკანა სავარძელში მისი შვილი. კაცს გვერდზე სატანა უზის, რომელსაც მხოლოდ თვითონ ხედავს.

სატანა: –გული აწუხებს ჰო?
მამა: –კი...
სატანა: –ვერ გადარჩება...
მამა: –ხმა ჩაიგდე!
სატანა: –ეს, ჩემს უთქმელადაც, მშვენივრად იცი. ისე ბავშვია და ჯოჯოხეთისთვის მეცოდება.
მამა: –გაჩუმდი მეთქი!
სატანა: _მე შემიძლია ავარიდო ჯოჯოხეთი...
მამა: –მე რა უნდა გავაკეთო?
სატანა: –სიჩქარეს მოუმატე.
მამა: –ტკივლი ტკივილის ნაცვლად?
სატანა: –ფიზიკური ტკივლი სულიერის ნაცვლად...
მამა: –შენი არ მჯერა.
სატანა: –ყველაფერი კანონიერად მოხდება.
მამა: –ეშმაკსაც წაუღიხარ.
    ეშმაკმა ღვარძლიანად გადაიხარხარა...
სატანა: –ყველაფერი კანონიერად იქნება!
მამა: –მაინც როგორ?
  ეშმაკმა დახეული სამოსის მარცხენა ჯიბიდან ფურცელი ამოიღო.
მამა: –ეგ რა არის?
სატანა: –კონტრაქტი. მხოლოდ ორ ადგილას მოგიწევს ხელის მოწერა.
მამა: –ჩემგან რა გინდა?
სატანა: –სული...

                                            * * *
შვილი: –მა, ცოტა ნელა იარე მეშინია. მა, ცოტა ნელა...
მა...
        მა ...
                ...
                                    * * *     
                შვილი: –სად ვართ მა?
                  მამა: –მოვედით...