მაღალ მთას მინდა მივაშურო
და იქ დავსახლდე,
სადაც მზეს რწყავენ,
ხელისგულზე იფარვენ სხივებს,
სადაც ვარსკვლავებს ისე კრეფენ,
როგორც გვირილებს...
და ან კენკავენ...
ზეცის ტბაში უშვებენ ტივებს...
მეც მინდა ვნახო
როგორ კენკავს ჩიტუნა ვარსკვლავს,
მინდა მზე მოვრწყო,
გვირილები ავკინძო დილად,
მინდა მეტივეს ჩამოვუჯდე
და სუფრა მოვრთო,
ვნახო - ეს ვარსკვლავ-გვირილები
როგორ გაშლილან...
იმ მთაზე უნდა გადავსახლდე,
საც ზეცას შევწვდე,
ჩამოვხსნა მთვარე
და მის ნაცვლად გვირილა დავსვა...
სადაც ღმერთების სამრეკლოში
რეკავენ ზარებს...
რეკავენ ზარებს...
დღესვე მინდა იმ მთაზე წასვლა.