გულს სევდა შემომწოლია,
სადა ხარ, პაპის ჯავშანო?
ტანზე მოგირგო, სისხლი და
ბრძოლის ყიჟინა ავშალო!
ხმალი ვაელვო, დაგაფრთხო,
დამძიმებულო ლოდინო!
მტერთან პირისპირ შემყარეთ,
სიკვდილი მოვალოკინო!
მტრის სისხლი დამალევინეთ,
თასი გამივსეთ პირამდის,
ან მეც მომკალით, ან ჯაჭვით
კავკასიონზე მიმაბით!
არწივმა ჭანგით მიფლითოს,
მკერდი და გულის ფიცარი,
ოღონდ გაბრწყინდეს მამული
უფალთან დასაფიცარი!