შენი ასული ვარ  მთვარე,
მზეა ჩემი დედა,
ქუსლზე მივიჭედებ ნალებს,
მხარზე შემოვისვამ ქედანს,
მხოლოდ დამიძახე ერთი,
შოლტი გადაჰკარი ზეცას,
სიმღერა ხომ ვიცი მგლური,
ხორცი არ იჭმევა ჩემი,
ხორცი მაქვს მჭლე და უმი.
მაინც გამომიხრეს ძვლები,
მაინც ფეხზე ვარ და ვყმუი.
შენი ასული ვარ მთვარე,
მზეა ჩემი დედა,
ქუსლზე მივიჭედებ ნალებს,
მხარზე შემოვისვამ ქედანს
და ისეთს ავტეხავ ზარებს,
რომ ქვა აღარ დარჩეს ქვაზე..
მეტყვი, ქალი ვარ და... არა?!
იქნებ არა გჯერა ჩემი?!
შენი ასული ვარ მთვარე,
მზეა ჩემი დედა...
მხოლოდ დამიძახე ერთი,
შოლტი გადაჰკარი ზეცას,
ქუსლზე დავიჭედებ ნალებს,
მხარზე შემოვისვამ ქედანს.