ნაწარმოებები



ავტორი: ნინო დარბაისელი
ჟანრი: პოეზია
17 აპრილი, 2015


ამაღამ ჩემი შეყვარებული მიდის

(ციკლიდან: ,,ეტიუდები")


ამაღამ ჩემი შეყვარებული მიდის.
დე, შეეწიოს ნათელი ყოვლაწმიდის!
თავს ვეუბნები: - საქმე გჭირს გასაკვირი,
ხარ გაცნობილი ამ ორიოდე კვირის,
მის უნახავად განვლე ცხოვრება ვრცელი,
სხვას არ ელოდი, დღეს იმას როგორც ელი?
არ შეგიცვნია მისი ცოდვა თუ ზადი.
ვინ იცის, მისით რა ხვედრი მოგიმზადა
ამ ბედისწერამ - დამგორებელმა ზოდის,
შენი წვალებით წვერამდე ანაზიდის.
ასე უმწეო ადრე ყოფილხარ როდის, -
- თავის გამცემი, აღარ მოფრთხილე რიდის!
გაუძლებ ტკივილს ამ გულის - დანაკოდის?
გჭირს ვერგაშვება იმ ხელის - ჩანაკიდის.
აბა, თუ ერთი აქეთაც მოიხედოს,
ვიდრე გასცდება თავს მოქანავე ხიდის...
წინ გეფარება ტანდაკოჟრილი ხე და
აღარც ტყე მოსჩანს, აღარც მთლიანი ხედი.
- როგორ ვეწიო რაიმეს, - საიმედოს,
რა დამრეცია მწვერვალი პირამიდის,
როს სიყვარული ასე - უეცრად მოდის,
შეყვარებული  - მთელი ერთი დღით მიდის.

კომენტარები ილუსტრაციები რეცენზიები