ეჰ, რომ შემეძლოს ახლად ცხოვრების
შენი გაცნობის დღიდან დაწყება,
მოვახერხებდი ალბათ როგორმე
მე სამუდამოდ შენთან დარჩენას.

ეჰ, რომ შემეძლოს იმ თბილ საღამოს,
რომ მიგატოვე ქუჩის კუთხესთან,
დავაბრუნებდი და იმ სიტყვებსაც
აღარ გეტყოდი უსასტიკესად.

ეჰ, რომ შემეძლოს. . . მაგრამ ღმერთების
ძალა არ შემწევს და მეფიქრება,
რომ ის დღეები დარჩება მარად
ცხოვრების მწარე გაკვეთილებად.


  29.01.1998წ.