დღეა სამხრისკენ, მზეა ნამზერი
რომელიღაცა გორაკს იქიდან.
მწვანე ანძებად ჩანან ნაძვები
და განწყობისთვის კარგ ფონს მიქმნიან.
მოჩამიჩუმდა სიო საგრილე,
მოსაღამოვდა ფერთა მქისებით.
ფიქრს არაფერზე აღარ ვაპირებ,
როცა აპრილის სუნით ვივსები...
მოიჟღურტულეს ეს დღე ჩიტებმა,
გადაძახილი აქა-იქაობს.
თოთო კვირტების წამოჩიტებით
ხე ფართოდგაშლილ მკლავებს იქავებს.
იცვამს ფანჯარაც საგაზაფხულოდ
ფარდას, ქათქათა მაქმანებიანს.
აპრილს მანამდე მოვინახულებ,
სანამ კვირტები "დაქალდებიან"...
          05.05.15