გაახურებენ შარაზე ცხენებს, შეერევიან ღამეს ლანდებათ, ცაზე კი ელვა(ურჩხულის ენა), ვარსკვლავებისკენ გაიკლაკნება. იქნება ფლოქვთა, ჩქარი თქარუნი, კლდეზე იაბოს ჩქარი ტარება და გააღვიძებს ქედებს ქალური, შეკივლება და ძალდატანება. იქნება გზაში, ყანწის გადაწვდა და სიყვარულის ურცხვი ხსენება, მაშინ როდესაც, ქალს სხვა უყვარდა და სიყვარული მოკლეს მხედრებმა. დროის შემდეგ კი, სერზე სათიბი, მზე თითქოს, მთების კერტებს ეხება და მოდის ქალი, ქალი ნატიფი და ქმრის ოფლიან სხეულს ეხვევა. სასწაულია, რა გინდა მეტი, ცა გადასერეს, ღრუბლის ეტლებმა, ქალია სხვისი ნეკნის ნაწილი და სხვის სხეულში მაინც ეტევა.