ორშაბათი

დატეხილია ჩემი თითები
და მზერა- ისე სევდიანი-
რომ სიზმრებსაც გადააბრუნებს.
ჩემში მთავრდება ორშაბათის
მშვიდი საღამო
და თითებიდან სისხლთან ერთად
საღამო წვეთავს...

ხოლო ის კაცი,
ვინც ჩემს მზერას ძაფი გამოსდო
და გულზე ძაფის გორგალივით
გადაიხვია,
დგას ორშაბათის ჩამოთოვლილ
გზაგასაყარზე...
ჩემი ცხოვრება ორშაბათის შეჯამებაა
და აღარ ვიცი, რას მივენდო,-
ამ კაცის ღიმილს-
რომელმაც ჩემი სევდა
გულზე  გადაიხვია
თუ ბრძნულ ნათქვამს, რომ
ორშაბათით იწყება კვირა
და ხვალე ყველა ორშაბათებს
ჩამოიტოვებს.
1999.