ხვარამზეს დატირება
მიშველე,
გეძახი სამარიდან,
ამოდის ჩემი ძვლებიდან სარეველა,
საფლავს მოკიდებია ობი,
ნეტავ სად არიან,
სად წავიდნენ, სად იმალებიან,
ძმები.
მიშველე, გეძახი სამარიდან,
სიყვარულს ცრემლივით ვმალავ,
ხელისგულებით გმალავ, გულში.
ჰო,
სამუდამო სამალავი,
მომიწყვეს,
დამტოვეს,
ასე,
ვიზამთრებ მიწას ამოფარებული,
მე კი ვიზამთრებ მარტო.
სიკვდილი სიზმარივით ავიხდინე,
გეძახი,
მიშველე,
მოდი...
მე გვერდით სათუთად შეგინახე,
ადგილი,
თბილი და მყუდრო.