"წყალი მომწყურდა" და ვითხოვე პეშვით,
სიყალბე ეგონათ, "მაფურთხეს" მუჭაში,
შენისთანაო უსულო ლეში
რამდენი ყრიაო იციო?-ქუჩაში!
იცი რამდენი იკეთებს ნიღაბსო?
რამდენს არ შია და ჩვევად აქვს ქცეული
უღმრთოდ დაჩოქილმა სიბილწე იკადროს
ჭინჭში გამოკრული ბინძური სხეულის?
სული შეურაცხყოს, ხორცი გააცალოს,
სიცრუის ცრემლებით შებღალოს სიმართლე,
მერე გაიღიმოს, ხარბად გადათვალოს
დღის ბოლოს ჯიბეში მოსქელო "სინათლე?.."
მოდი და ედავე, უმტკიცე სად არის
შენთან თუ იმ სხვასთან ღვთიური შენდობა?
ერთ ქვაბში თავმოყრილს ყველას გვწვავს ღადარი,
დავკარგეთ, დავკარგეთ, დავკარგეთ "მეს" ნდობა.