1
შენი დანახვა ამ გულს ჯერაც ადევს ხუნდებად
და სიყვარულით დღევანდლამდე გლოვას უნდება,
ვერ მილეულა ვეღარაფრით გულის სახმილი
და ეს უშრეტი ცრემლთა დენაც ვერ ძაბუნდება.

2
შენი ხილვისგან ზღაპრად დარჩა მთელი ქონება,
შენმა თვალებმა გაახელეს საღი გონება.
საწუთრო შენით საკუთარ თავს გაუნაპირდა,
მზეს შენი ჩრდილით ქვეყანაზე არ ედგომება.

3
ერთ ღამეს მთვარემ მოიხილა შენი ღაწვი და
შურით თვალთაგან სისხლის ცრემლი წამოაწვიმა
და როცა ღაწვებს მისი წვეთი ჩამოეღვარა,
მაშინ გამოჩნდა შენი ღაწვიც, ნაზი ასწილად.

4
შენს ძიებაში გაილია რამდენი ღამე,
ბევრი ამო დღეც, შენს ბაგეებს რაც მივეკარე,
წახველ და ახლა დღეცისმარე ამას ვჩურჩულებ:
შენთან შეხვედრის განთიადიც დაღამდეს ბარემ.

სპარსულიდან თარგმნა
გიორგი ხულორდავამ