წიგნიდან  -
,, სიყვარულის  საუკუნე ’’
*************************************************************

ცისარტყელას 
მონატრებისა
*******************************************                     
ლალის  და  მირანს

ჩემს  ნატვრის  ხეს  -
ოლეს,  ვერანს,
ხედავ,
ჟამი  ვით  ბელავს...
ქარმა  ზამთრის  რაც  დაჰბერა,
გულიც  ვერ  გავითბე  რა...
-  მომენატრა  ცისარტყელა
შვიდმშვილდა  და  შვიდფერა!



ლამაზი 
გიჟისა
****************************
მინაწერი 
მირან  ფალიანის 
ლექსზე 
,, ფუფალა ’’


ჯერაც  სვეწერას 
გულის  გარდა 
ვერცრა  ვუფარე
და  კვლავ  შენ  აგცქერ 
რწმენით  და  შიშით...
მიეფერე  და  დაიფარე  უფალო, 
ფუფალა  -
სიყვარულისთვის  დიდმოწამე 
ლამაზი  გიჟი!!!



მარიამ 
მაგდალინელის 
გახსენებისა
******************************************
მარიამ  მაგდალინელ!.. 
-  მიყვარხარ,  მახსოვხარ!..
შენს  მონანიე  სულს 
მოკრძალვით    ვეხები...
ეახლე  შენს  გამო 
ჯვარსგაკრულ  მაცხოვარს  -
თმებით 
გასისხლული 
შეუშრე  ფეხები!..



წამიერი 
ცეცხლისა
*********************************************
დაგავიწყდება  ეს  ღამეც  მალე
( ეს  მცხრალი  მთვარე 
მალე  გაქრება...)
და  წამით 
ცეცხლად  მოდებულ 
ალერსს
მოისაკლისებ  მასზე  ნაკლებად...



გაუცხოებისა
*******************************************

შენ  ახლა  უფრო  უცხო  ხარ  ჩემთვის,
ვიდრე  გაცნობის  დღემდე  იყავი...
მივშტერებივარ  უხილავ  წერტილს...
მშვენიერია  შენი  ნიღაბი...


ხალვათი 
ქოხისა
***************************************

ქოხი  -
ღამის  გასათევად  -
სიყვარულის  დასატევად
მადლი  უფალს  -  გვაბადია!..
ხალვათია...



სამარტო 
მონატრებისა
************************************

როცა  ცინცხალი  სიცოცხლის  მაცნედ
ურიცხვ  მერცხლებით  მოვლენ  მარტები,
ტანშიც  ნაცნობი  ცახცახი  გამცრის  -
კვლავ  უსაშველოდ  მომენატრები!..



,,გულქვა  მუსიოზე’’ 
უიმედოდ
შეყვარებულისა
**********************************                   
                  ჭა-ს

გულქვებთან
ნაზი  გული  ჰპოვებს  ზიანს...
-  მტერმა  გაიაროს
მათ  ჭკუაზე!..
მუსიო  იქს  -
თუ  წყალობს  პოეზიას,
-  უნდა  გაღმერთებდეთ,
მადმუაზელ!



ეპიტაფია
********************************************
დიდხანს  მიმშვენა  გაზაფხულმა
ყოფა  იებით...
ბოლოს  -  ჭკნობათვე  ამიყვავა
რობაიებით...
გარეშე  გრძნობის  - 
ვისაც  ლექსი  არ  უწერია,
არ  უწერია  მას  არც  ტრფობით 
თრობა  -  იეფით!..

**************************************************************