* * *


ის ყანას წმენდდა ბალახისგან,
სარეველისგან.
ზაფხული იყო, რომ იტყვიან მზე შუბისწვერზე
იდგა, ცხელოდა.

წყალიო, - მითხრა
და წავედი წყლის მოსატანად.

მეზობლის ჭასთან მივირბინე,
ჭიქა ავავსე
და ვიდრე უკან მოვბრუნდებოდი,
ჩემი ბავშვობის მეგობრები გამოჩნდნენ გზაზე,
ბურთით ხელში...
მე მათ გავყევი.

წლების შემდეგ კი,
როცა აღარც ბაბუა იყო,
აღარც სიმინდს ვთესავდით, მაინც
გავედი იმ ძველ ნახნავებში,
დილიდან, ადრე გავედი და მეც შუადღისას
წყალი მომწყურდა.

ზუსტად ეს მსურდა;
რომანტიული ტანჯვა მომეწყო
ჩემი თავისთვის,
წარსულის იმ შეცდომის გამო...

და განა ვინმემ მომიტანა,
ან მე წავედი ჭიქა წყლისათვის,

წვიმა დაიწყო.




* * *



უსათაურო ლექსები მიყვარს,
ზემოთ რომ ფიფქებს,
ან ვარსკვლავებს ვუხატავ ხოლმე.

კაცივით დგას ასეთი ლექსი,
მარადიულად ათოვს სახეზე,
ან ცას აჰყურებს
და რაღაცას შესთხოვს
პლანეტებს.




* * *



ერთი დღის დღიური

1

ბოლოს შევჩერდით დანგრეული სახლის ადგილზე
და ვიცინოდით დიდხანს, ხმამაღლა.
გვიან შევნიშნეთ,
კედლებიც კი აღარსად იდგნენ,
რომ შეენახათ ეს იშვიათი მხიარულება...

და ყველამ ერთად შორს გავხედეთ
მაღალ შენობებს.

აბა, იქამდე ხმას და სიცილს რა მიიტანდა?!

2

ლურსმნის ჭრილობა
ტერფებსა და ხელისგულებზე,
ეკლის გვირგვინი,
მხრებზე კი ხორცი
დაფლეთილი, სისხლმომდინარი, -

ეს იხილეს მოწაფეებმა,

მაგრამ მათ ალბათ არც კი იცოდნენ
ის იარები მუხლისთავებზე,
რომლებიც კარგად ნაცნობი იყო
ქრისტეს ბავშვობის მეგობრებისთვის.

3

გამთენიისას რომ იღვიძებ
მეგაპოლისში -
ბეტონის და ქვის მასივებში,
ფანჯრებს გააღებ და მიაგინებ
ხეზე მსხდომ ჩიტებს,
რომ გალობენ და ჭიკჭიკებენ გაუთავებლად,

რატომ არასდროს გაგონდება,
დადგე სარკმელთან
და გასძახო,
რომ მშვენივრად ხარ
და რომ მთელი ღამის მანძილზეც
კარგად იყავი!.. -

უთხრა ასე
და დაამშვიდო.


4

რასაც ადვილად დაივიწყებენ,
შემოინახე ის შენს ლექსებში.

მე ყოველთვის ვარსკვლავებზე ვწერ,

განა იმიტომ,
რომ არ მჯერა იმ ვარსკვლავების
მარადისობის,

უბრალოდ მე არ ვიცი მათგან
რომელი როდის
მოწყდება ჩვენს ცას.



* * *



ხურდა ფული იქნებ მომცეო, -
იდგა ვიღაც ნასვამი კაცი
და ყველა გამვლელს უებნებოდა.

ჩავიარე და აღარ ვიცი
ზუსტად რა მოხდა,

მხოლოდ მისი სიტყვები მახსოვს,
ერთ-ერთ დამხმარეს რომ მიაძახა:

- ფულად კი არ მჭირდება, ძმაო,
ნიკალას ირემს მინდა ვუყურო!..

მათ შორის,
ვინც კი სადმე მინახავს,
ის უდიდესი თაღლითი, ან
ესთეტი იყო.