ჯარისკაცის სიმღერა

ღამეს სანგარში ვათენებ ისევ,
ტაძრიდან ლოცვა მესმის - აქსიოს!
მე მივეჩვიე დენთის სუნს ისე,
არ მინდა ვინმემ გადამაჩვიოს...

მაშხალით ღამის მოსვლა მანიშნეს,
ვდარდობ ავადმყოფ, მოხუც დედაზე
და თავი მიდევს განა ბალიშზე
ტყვიით განგმირულ მოძმის ცხედარზე...

ის დღემდე თბილი იყო ძალიან:
- კლდე უშიშარი, მთა უღალატო,
ახლა გაცივდა, საოცარია
და დაღლილს აღარ ძალმიძს გავათბო...

ღამეს სანგარში ვათენებ ისევ,
ტაძრიდან ლოცვა მესმის - აქსიოს!
მე მივეჩვიე დენთის სუნს ისე,
არ მინდა ვინმემ გადამაჩვიოს...