შენ გამოგყვები, შენს ღიმილს და შენს აღტაცებას,
სურს ლურჯი მთები და მინდვრები გადამატაროს,
მაგ შავ თვალებში ცისარტყელა ჩაიხატება,
ჩემო ოცნებავ, ჩემო ცხადო, ჩემო ზღაპარო...

ჩემო პატარავ, ჩემო შვილო შენი მხილველი,
მძიმე ტვირთივით მივაცილებ დარდს და სიბერეს,
ლაჟვარდებისკენ გამიძღვები როგორც ფრინველი,
როგორც მნათობი, როგორც სითბო, როგორც სიკეთე...

ჩემო ლამაზო, ცელქო გოგოვ ჩემი დღეები,
შენზე ოცნების სიმღერაში გათენდებიან
და შენს ძებნაში უცნაური უფლისწულები
ყალყზე შემდგარი რაშებივით გახელდებიან...

ვერ შემაჩერებს ცივი ყინვა ქარის შოლტებით,
მწვერვალებამდე მოგყვებიან ჩემი თვალები,
მერე კი ჩუმად, უცნაურად ჩამოგშორდები
და სადმე, იქვე პატარა ბორცვს მივეფარები...