ძველი თემა
ძველი თემაა ქამი და სემი,
აქ შეუყვარდა ადამი ევას,
გორგასალსა ჰგავს ქალაქი ჩემი,
ხოლო ქუჩები ცხენების რემას...
კლდის ქიმს ჩამოჰგავს ამაყი ხედი,
პერგამენტს ქსოვენ მათე და ლუკა,
აქ წარღვნის მერე მოფრინდა მტრედი
და არ დაბრუნდა ნოესთან, უკან...
ჰგვანან დღეები გაფრენილ ქედნებს,
ცა მეტყველია წვიმების ბროლით,
და დედამიწის ცარციან კედლებს
მოარგო ტალღამ ფრაზა და როლი,...
ისევ ღრუბლების იარუსს შევრჩი,
მზეს ოქროსფერი უჭირავს თარი,
და მობარბაცე ხეების წრეში
ჩრდილების თეატრს აცოცხლებს ქარი...

***
აანთებს ჩირაღდანს აქილევსი,
არაგვი იფიქრებს არაგველზე
ხანდახან პოეტის ერთი ლექსი
ათას ლექსს მოისვრის სანაგვეზე...




7.16.2015