ათასში ერთხელ, სადმე გულს თუ გაიხალისებ,
რომ არ ჩაგმწარდეს, არ ჩაგშხამდეს, არ შეიძლება
ყოველი ღამით სულის ფსკერზე გდია მკვდარი მზე
და ყოველი დღეც სამწუხაროდ ასე იწყება.

ათასში ერთხელ აიწევი მიწიდან მაღლა,
გამარჯვება და დამარცხება თავს არ გახსენებს
და ზუსტად, როცა უნდა მიწვდე სამოთხის მაღნარს,
დაგეწევიან და მიწაზე დაგანარცხებენ.

ათასში ერთხელ სადმე გულს თუ გაიხალისებ,
კარგი, ჩაგშხამდეს იმ ერთხელაც, რა შეიცვლება,
მაგრამ ყოველდღე სულის ფსკერზე ეგდოს მკვდარი მზე,
არ შეიძლება ღმერთო ჩემო, არ შეიძლება !