ვარსკვლავებს ვმწყემსავ.
ვარსკვლავები იცრემლებიან.
ვერ მოგახურე საბნად ლურჯი სიზმრის ღრუბელი,
რადგან მშფოთვარე, მგლოვიარე და დამთრგუნველი,
ეს ჩემეული თეთრი ღამის თვისებებია.

ხეირიანად, შენთან ყოფნაც ვერ შევიფერე,
რადგანაც ბედად, მე სიკვდილის მერგო მდგმურობა;
ძვირფასო, არის სიკვდილშიდაც უცნაურობა,
თუკი ბავშვიხარ და სამარეს გითხრის სიბერე.

ვერ მოგახურე საბნად ლურჯი სიზმრის ღრუბელი.
არამც თუ ლურჯი სიზმრის ნახვა აღარ მეღირსა,
უბრალო სიზმრის ნახვაც არის საქმე სამძიმო
და ბოდიშს გიხდი, ყოველ ღამით, სიზმრად თუ მელი.
უცნაურია, მითხრა სიტყვა - ძილინებისა
და შენზე ფიქრით, მთელი ღამე არ დამაძინო.