უიმედო წუთები გადიან და შენ ისევ,
მერამდენე ღამეა აღარ გყოფნის ცრემლები.
მხრებდაშვებულ ტანიდან - დარდი ვადაგასული
დაიბერტყე, ტკივილებს ასე ნუ მიეჩვევი!

და თუ გუშინ ცხოვრებამ დაგამტვრია მაჯები,
თუ უღმერთო სიცხეშიც ყველაფერი გაცივდა...
მაშინ ტვირთად ქცეული - აიხსენი ჯვრები და
დედამიწა ფეხქვეშ და ულმობელად გაცვითე!!!

დროის ათვლა დამთავრდა - შეცდომების დაშვების
ანუ ის დროც წავიდა, ვინმემ ხელი ჩაგკიდოს,
გამომწყვდეულ სხეულში ღამეს თეთრად ათენებ,
ფიქრის მეტი (ან რა) და როგორ უნდა აკეთო...

ერთი, ორი, სამი და... რაღა გეპოეტება!
გაცრეცილა სამყარო თვალის ღია გუგებში.
თუმცა, თეთრი ლოცვების არ ღირს გამოტოვება,
რადგან, ისევ ღმერთთან თუ დაგრჩენია ნუგეში...

მაგრამ, თუკი ცხოვრებამ დაგამტვრია მაჯები,
და უღმერთო სიცხეში მაინც გიტანს ციება,
მაშინ, ტვირთად ქცეული - აიხსენი ჯვრები და
მაშინ, ყველა შეცდომა უკვე გეპატიება!