ვიცი, მიგონებ ძველ მოწიწებით,
და ალბათ, ფიქრში უფრო ვდიდდები…
გულს კიდევ ბევრჯერ აგიწეწავენ,
ჩემი ცივი და გრძელი თითები...…
ცილისწამებით გული იჯერეს და მაინც…
შენთვის დავრჩი უცვლელი.
ბევრი შიშისგან თავს რომ იტყუებს,
სხვასაც ბრიყვული ეჭვით უცქერის.
ერთი მარგუნა ბედი განგებამ -
არც გავქცევივარ მე მის არჩევანს,
თუმცა, ძნელია გზების გაგნება
და უფრო ძნელი - გზების არჩევა. 
ცვალებადია გზებიც ქარივით,
უცბად იწყება, უცბად თავდება
გზებიც ითხოვენ ზოგჯერ ქალივით
ერთგულებას და თავის დადებას.
ცვალებადია, გზებიც ქარივით,
ხან გამტანია, ხან - მუხანათი,
ერთ დროს ერთგულ და ლამაზ ქალივით,
გზებმაც იციან, ზოგჯერ ღალატი.
ყველა თავის თავს არქმევს უცოდველს,
ყველა თავის გზით ეძებს სინათლეს,
ყველა თავის თავს მართალს უწოდებს
და... ღმერთმა უწყის... ყველას სიმართლე...