ის დაასრულებს ნახატს სახელწოდებით: "წითელი მამლის გადაფრენა",
გამოვა თექვსმეტსართულიანი სახლის მეჩვიდმეტე სართულის აივანზე,
ახედავს ცას და ნაოჭასხმულ ქუთუთოებს დაუშვებს დაბლა.
მზე მხედველობის ორბიტაზე გადმოინაცვლებს...
მერე კი, ასე ხმელ-ხმელი და მაღალი,
გაჟღენთილი ზეთის საღებავებით – სულ იოლად აბრიალდება.

თვრამეტ საათზე
გადმოსცემენ ცხელ-ცხელ ამბავს,
რომ ცაგარელზე გაჩნდა ხანძარი,
დაიწვა ბინა-სახელოსნო,
თავად მხატვარი ვეღარსად ნახეს.
თვითმხილველთა განცხადებით
ის ცამ ჩაყლაპა!

p.s.
მე იქვე ვცხოვრობ
და შემიძლია დავამატო,
რომ მას შემდეგ,
ყოველ ცხრამეტ აგვისტოს,
ჩვენს ქუჩაზე
მზის ჩასვლამდე ყივის მამალი.