ნაწარმოები შეიცავს უცენზურო ფრაზებს

თუ თქვენ გინდათ ნახოთ მხოლოდ ეს ნაწარმოები, დააჭირეთ აქ

         

მზერაში იდგა ფერი ისვრიმის
ტოტებს ეყარა ძუძუ: გარგარი
ზამთრის სუსხიან გვიანს მისმინე:
არც ქადაგი ვარ არც სოვდაგარი.
არც შეგინდე და აღარც გიყიდე
ვერც წაგართვი და ვერც გაგიყავი
ვერ მოგატყუე შე, სასიმინდე:
ვერ გაგიმეტე გზანარიყალი.
ისვრიმო ქვითკირს ნეშო გაუჯდა
ამ ლექსით ზურაბს ქვაში მივყვები
და გული ჩემი ჯერ ვერ დამუნჯდა:
კვლავ ქერა შენი მიყვარს დიყები.
სისხლში გეძახის ქალაქის არმა
ღობეებს არღვევს ცივი და მკაცრი
შენ არ გეცმება კოჭამდე ნარმა
არც პურს ჩააკრავ დ არც ფქვილს გაცრი.
ეშმაკს დარჩება ფქვილიც და ქატოც
ძონძებში ივლის  იესოს ლოცვა
მე ვწყევლი ჩემი ლექსების ატომს
ლექსიც ითვლება რადგან ფოლორცად.
ამ უთენია რითმა მოვზილეთ
და ვხვდებით ბოლოს ვინ ვართ ვინ ვრჩებით
როგორც ღალატში ნაპოვნ დობილებს
ისე ეტყობათ ლექსებს ჯიქნები.
ისევ ვშლეგდები გოროზ შიგნებზე
ისევ ვეძახი გოგო წიქარას
ისევ ბიბლია მიდევს წიგნებზე
თუმცა სულ უფრო ცოტას მივქარავ.
უკვე გითხარი: ნეშო გამიჯდა
მალე აქედან გავიჯიყები
და სისხლი ჩემი ჯერ ვერ დადინჯდა:
კვლავ ქერა შენი მიყვარს დიყები.