ნაწარმოები შეიცავს უცენზურო ფრაზებს

თუ თქვენ გინდათ ნახოთ მხოლოდ ეს ნაწარმოები, დააჭირეთ აქ

40 გრადუსი ანუ ბინათმშენებლობა

დილის ფრთებზე ენგურს ვახლდი ემხას
შუამზეს კი ნილოსის ქვებს ვისვრი
ყველაფერი მაცხელებს და მწნეხავს
სველ ლახვარზე მსურს გალესვა კისრის.
სამი დღეა ვერ შევდივარ სვიფტში
მოსწყენია წამოწოლილ სვიტერს
ვგრძნობ: ვიღაცა გაიჭედა ლიფტში
ღმერთო რამდენ ჩემისთანას იტევ.
ღმერთო რამდენს ვწერთ, ვწევართ და ვწვალობთ
პოეზებრებს მისდევს ძმებო ზოლა
მირეკავენ მე ვპასუხობ: ალო!
გამოცრილი ჟრუანტელი: ოლა!
თუმცა ხშირად მამგვანებენ მოლას
მინდა მარად ვიყო ბერი ვინმე
ვიდრე ღმერთი ჩემს ფიცრულთან მოვა
ეშმაკები იშენებენ ბინებს...
..............................................
         


        აღსარება
იყო გზა: თავქვე უღლის
იყო გზა: აღმა ძელის
ჩრდილში შედგომა თუ ღირს
ჩრდილამდე თუ შევძელი
და ბოლოცოდვა ჩემი
სულ მეოთხედი გვერდის:
დედა ვაკივლე ემის
როგორც ჯუზეპე ვერდი.


            საფლავი 
ეხ ჩემო ძმაო, ჩემო სოკრატე
ყველაზე უფრო მეტად შენ გგავდი
მერე რაღაცა მითხრა დეკარტემ
და დაიბადა ჩემში გეპარდიც.
იქემენიდან ძახი აჰურის
დღეს ბადე უდგათ აინშტაინებს
ორაგულივით ლექსი ქართული
იცნეს სილაზე გამატანინეს.
და სანამ მიწა, წყალი გადავა
მე ქვარიყეებს ვიცავ რიკოთის
პატივს ვცემ ჯიშს და ჯიშიან გავას
და ისიც ვიცი შენ რას იტყოდი:
ამაღამ ცაზე გადადის ჰერა
ჯიქანზე იწვენს გრიგალის ფაფარს
ძმაო გეპარდო, თუ ვერ დაქერავ
დავიწყებაში, ღვთის ფერფლში დაგფლავ.