ნაწარმოები შეიცავს უცენზურო ფრაზებს

თუ თქვენ გინდათ ნახოთ მხოლოდ ეს ნაწარმოები, დააჭირეთ აქ

არტემონის ლექსი

ძველ ნაჯახს ლესავს დროის მასათი
ახალ ეშაფოტს მოახრიგინებს
მომაწევინეთ ვინმემ... ასანთიც
თუ მოვუკიდებ არ შეგიგინებთ:
გაყიდულ საძვლეს... რაღას დავეძებ
მალვინა! ღმერთსაც არ ვერკინები
დამალევინე როგორც გარეწარს
რამე: ნარჩენი არლეკინების...
წარში იჭრება სისხლი უცები
შთება და ვიღან გაძლება მომცეს
მე მივყეფ მზეთა ჟამს მოხუცების
გაფერხულებად და მეორმოცედ
მომიძულებენ შვილები მშვიდად
ცოლიც უჩემო სიზმრებმა ლოკეს
მურმან სანამ ჩვენ ლაჟვარდებს ვჩრიდით
მთლად გოდოლივით გაგვჩარეს... მოკლედ:
დაბირკულ ბილიკს მუხლებით ვესავ
გარშემორტყმული ამდენი ქლესით
ეს იყო ჩემი ესაც და მესაც
გავახილე და ბოლომდე შევსვი...


რუთა დალალი

ძმაო, მერებო, მდგარო მდუმრიად
გადაუარა დელგმამ მძინარე
ივრითს... იგუბა წყალმა დუნია
წაიღო ღამე გზასამძიმარი...
და მეც სიჩუმის საგზალს ვილაგებ
თენდება... მგლებიც აღარ გალობენ
რადგან ლექსების გაწყდა ჯილაგი
სიტყვებიც უკვე მამათმავლობენ...
უნდა გავთირო, ნეკნზე შევიბა
ჩემი მარების ორბი დედალი
მტერს რომ არ დარჩეს ჩემი სათიბი
ჩემი სამწყემსო და სახედნავი.
ლექსი სარანგად ეყოს ქარაგმებს
თქვენ კი იცნობდეთ დალალს ქარაგმის
სიკვდილი ვიდრე... ვიდრე ამაგნებს
ძნელ ვიწროებზე ძმებო, არაგვის...


მონღოლური თეორემა

ვინ გაჰყვებოდა საგზაოდ არათს
სიზმარგვიმრეთის იდუმალ ტყეში
რა დემონურად თენდება არა?
ამ ჩემს ღვთაებრივ ხილულ სიბრტყეში
ამ წრფეებს ისევ მიაქვთ გზა კავთის
მამათა წესით სისხლით ნალურჯი
მე შევხვდი ათას წრეწილს მზაკვართა
იქიდან ერთსაც ვერ გადავურჩი.
და ამ კონუსურ ღრმოვან ღელვაში
მოღლილ მონღოლის გწვავდნენ მკლავები
გისაფრდებოდი ქარღვარელვაში
თვალები მყავდნენ მოსაკლავები...

წაწლური

ქალდე-ქარაფის ქარაფზე აცმა
იქ იყო ჩვენი თავლაც აზგარდიც
ამბორულევო, თენებამ გაგვცა
გოგო, ფეხები ასწი, ასწრაფდი...
მე შენ მზეების ზორვა გიძღვენი
ამ ცეცხმოდებულ ზეცის ვსვი ლექი
როცა ანცობდი ვერ გაგიძელი
და რომ გამცილდი გამოგიდექი...
ან ცა რად არი მდელო ავდართა
ანდა ამ ზეცის რად ვარ მოდარდე
ამოჯადოვდი მზეო არაგვთან
გადარდი, დარდიც მორჩეს, მოთავდეს...
ალჯადოური კვიცების მეტბევ
ძუძუზე გკბენენ ავი ლანდები
ამო, აისის ისრიმში შევტკბეთ
სანამ მზის ქაფში გამიბანდები...

მოგიკითხეთ:)